த.வெ.க-வுக்கு காங்கிரஸ் ஆதரவளிப்பது முதுகில் குத்தும் செயல் - தி.மு.க. கடும் கண்டனம்!

தமிழகத்தில் ஆட்சி அமைக்க த.வெ.க-வுக்கு காங்கிரஸ் ஆதரவு அளிக்க முன்வந்துள்ளதை தி.மு.க. வன்மையாகக் கண்டித்துள்ளது. நீண்டகாலக் கூட்டணியைத் தகர்த்து, மக்கள் தீர்ப்புக்கு எதிராகக் காங்கிரஸ் செயல்படுவதாக தி.மு.க. குற்றம் சாட்டியுள்ளது.

தமிழகச் சட்டசபைத் தேர்தல் முடிவுகளுக்குப் பிறகு, ஆட்சி அமைக்கத் தேவையான பெரும்பான்மையைத் திரட்ட தமிழக வெற்றிக் கழகம் (த.வெ.க.) முயன்று வருகிறது. இந்தச் சூழலில், த.வெ.க-வுக்கு ஆதரவு அளிக்க காங்கிரஸ் முன்வந்துள்ள முடிவு, தி.மு.க-வின் முதுகில் குத்தும் செயல் என்று அக்கட்சியின் செய்தித் தொடர்பாளர் சரவணன் அண்ணாதுரை விமர்சித்துள்ளார்.

செய்தி நிறுவனம் ஒன்றுக்கு அளித்த பேட்டியில் சரவணன் அண்ணாதுரை கூறியதாவது:    "த.வெ.க-வுக்கு ஆதரவு அளிப்பது என்ற காங்கிரஸின் நிலைப்பாடு மிகவும் குறுகிய பார்வை கொண்டது. 2029 நாடாளுமன்றத் தேர்தலில் பா.ஜ.க-வை வீழ்த்த முடியும் என நாங்கள் நம்பியிருந்த சூழலில், காங்கிரஸ் ஒரு நிலையற்ற கூட்டணிக் கட்சியாகத் தன்னை அடையாளப்படுத்திக் கொண்டுள்ளது. காங்கிரஸை இனி நம்ப முடியாது என்ற கருத்து நாடு முழுவதும் பரவத் தொடங்கியுள்ளது."

தேர்தல் முடிவுகள் வெளியாகி ஒரு நாளே ஆன நிலையில், காங்கிரஸ் எடுத்துள்ள இந்த முடிவு இண்டியா கூட்டணியில் உள்ள அகிலேஷ் யாதவ், தேஜஸ்வி யாதவ், உத்தவ் தாக்கரே போன்ற பிற தலைவர்களிடையே பெரும் அதிர்ச்சியை ஏற்படுத்தும் என சரவணன் தெரிவித்தார். பா.ஜ.க. மற்றும் ஆர்.எஸ்.எஸ்-க்கு இடம் கொடுக்கக் கூடாது என்பதற்காகவே இந்த முடிவை எடுத்ததாகக் காங்கிரஸ் கூறுவதை தி.மு.க. ஏற்க மறுத்துள்ளது.

காங்கிரஸ் கட்சியைத் தி.மு.க. ஒருபோதும் ஏமாற்றியதில்லை என்று குறிப்பிட்ட அவர், கடந்த கால நிகழ்வுகளை நினைவுகூர்ந்தார்: 2016-ல் காங்கிரஸுக்குக் கணிசமான இடங்களை ஒதுக்கி வெற்றி பெறச் செய்தது தி.மு.க. ராகுல் காந்தியைப் பிரதமர் வேட்பாளராக முதல் முதலில் துணிச்சலுடன் முன்னிறுத்தியவர் தலைவர் மு.க. ஸ்டாலின்.

தி.மு.க-வின் கடின உழைப்பாலும், செலவிட்ட வளங்களாலுமே 2024-ல் ராகுலின் செல்வாக்கு உயர்ந்தது. தற்போதைய தேர்தலில் காங்கிரஸ் 5 தொகுதிகளில் வெற்றி பெறவும் இதுவே காரணம். த.வெ.க. ஆட்சி அமைக்க இன்னும் 11 இடங்கள் தேவைப்படுகின்றன. இந்த நிலையில் சரவணன் அண்ணாதுரை ஒரு முக்கியமான கேள்வியை முன்வைத்தார்:

47 இடங்களைக் கொண்டுள்ள அ.தி.மு.க. நிபந்தனையற்ற ஆதரவை வழங்கத் தயாராக இருக்கும்போது, வெறும் 5 இடங்களை வைத்துள்ள காங்கிரஸின் பேச்சை விஜய் கேட்பாரா? காங்கிரஸ் ஒரு தவறான முடிவை எடுத்துள்ளது, இதற்காக அவர்கள் வருந்த நேரிடும்." என்றார்.