அமைச்சரவையில் நாடார் சமூக எம்.எல்.ஏ-க்களுக்கு அமைச்சர் பதவி வழங்க வேண்டும்: சமக தீர்மானம்!

தூத்துக்குடியில் நடைபெற்ற சமத்துவ மக்கள் கழகத்தின் மாவட்டச் செயற்குழு கூட்டத்தில், தமிழகத்தின் பெரும்பான்மை சமுதாயமான நாடார் சமூகத்தைச் சேர்ந்த சட்டமன்ற உறுப்பினர்களுக்கு அமைச்சரவையில் உரிய பிரதிநிதித்துவம் வழங்க வேண்டும் என வலியுறுத்தித் தீர்மானம் நிறைவேற்றப்பட்டது.

தூத்துக்குடியில் உள்ள மாவட்ட அலுவலகத்தில் நடைபெற்ற இந்தச் செயற்குழு கூட்டத்திற்கு மாவட்டச் செயலாளர் மாலைசூடி அற்புதராஜ் தலைமை தாங்கினார். மாநிலத் தொழிற்சங்கச் செயலாளர் ஜெபராஜ் டேவிட், மாநிலக் கலை இலக்கிய அணிச் செயலாளர் வழக்கறிஞர் அந்தோணி பிச்சை ஆகியோர் சிறப்பு அழைப்பாளர்களாகக் கலந்து கொண்டு ஆலோசனைகளை வழங்கினார்கள்.

முதலமைச்சருக்கு வாழ்த்து: தமிழகச் சட்டமன்றத் தேர்தலில் வெற்றி பெற்று, பல்வேறு கட்சிகளின் ஆதரவுடன் புதிய ஆட்சிப் பொறுப்பேற்றுள்ள தமிழக வெற்றிக் கழகத் தலைவரும், மாண்புமிகு தமிழக முதலமைச்சருமான திரு. ஜோசப் விஜய் அவர்களுக்கு இக்கூட்டம் மனமார்ந்த வாழ்த்துக்களையும் பாராட்டுக்களையும் தெரிவித்துக் கொள்கிறது.

அமைச்சரவையில் பிரதிநிதித்துவம்: தமிழகத்தில் வணிகம், விவசாயம், பனைத் தொழில் எனப் பல்வேறு துறைகளில் ஒன்றரை கோடிக்கும் அதிகமான மக்கள் தொகையைக் கொண்ட பெரும்பான்மை சமூகமான நாடார் சமூகத்திற்கு அமைச்சரவையில் உரிய பங்களிப்பு வழங்கப்பட வேண்டும். தவெக சார்பில் வெற்றி பெற்றுள்ள திருவைகுண்டம் எம்.எல்.ஏ சரவணன் மற்றும் நாங்குநேரி எம்.எல்.ஏ ரெட்டியார்பட்டி நாராயணன் ஆகிய இருவருக்கும் அமைச்சரவையில் வாய்ப்பளிக்க வேண்டும்.

காமராஜர் வழி ஆட்சி: பெருந்தலைவர் காமராஜர் வழியில் ஆட்சி நடப்பதாகத் தெரிவித்துள்ள முதலமைச்சர் அவர்கள், காமராஜர் பிறந்த சமூகத்திற்கு உரிய கௌரவத்தை அளிக்க வேண்டும். கடந்த திமுக ஆட்சியில் நாடார் சமூகத்திற்கு 3 அமைச்சர்கள், சபாநாயகர் மற்றும் வாரியத் தலைவர் பதவிகள் வழங்கப்பட்டதை இக்கூட்டம் சுட்டிக்காட்டியுள்ளது.

பெயர் மாற்றத்திற்குப் பாராட்டு: அரசுப் போக்குவரத்துக் கழகம் என்பதை "தமிழ்நாடு அரசுப் போக்குவரத்துக் கழகம்" எனப் பெயர் மாற்றம் செய்த முதலமைச்சர் மற்றும் தமிழக அரசின் முடிவிற்கு இக்கூட்டம் பாராட்டுத் தெரிவிக்கிறது.

நாடார் பேரவை மாவட்டத் தலைவர் அருண் சுரேஷ் குமார், மாவட்டப் பொருளாளர் சுப்பையா, மகளிரணித் தலைவி சந்திரா மற்றும் சமத்துவ மக்கள் கழகத்தின் பல்வேறு அணிகளின் செயலாளர்கள், நிர்வாகிகள் இக்கூட்டத்தில் பெருமளவில் கலந்து கொண்டனர்.