தெற்கு ரயில்வேயின் புதிய தலைமை மக்கள் தொடர்பு அதிகாரியாக எஸ்.என். நரேன் நியமனம்!

தெற்கு ரயில்வேயின் தலைமை மக்கள் தொடர்பு அதிகாரியாக (Chief Public Relations Officer - CPRO) மூத்த ரயில்வே அதிகாரி எஸ்.என். நரேன் இன்று முறைப்படி பொறுப்பேற்றுக்கொண்டார்.

2010-ஆம் ஆண்டு 'இந்திய ரயில்வே போக்குவரத்து சேவை' (IRTS) பிரிவைச் சேர்ந்த அதிகாரியான எஸ்.என். நரேன், ரயில்வே துறையில் பல்வேறு முக்கியப் பொறுப்புகளை வகித்த அனுபவம் கொண்டவர். குறிப்பாக: பயணிகள் வசதிகள் மேம்பாடு, செயல்பாட்டுத் திறன் மற்றும் டிஜிட்டல் தகவல் தொடர்பு ஆகியவற்றில் அதிக கவனம் செலுத்தியவர்.

திருச்சி கோட்டத்தின் முதுநிலை வர்த்தக மேலாளர், சென்னை மற்றும் பாலக்காடு கோட்டங்களின் வர்த்தக மேலாளர் எனத் தெற்கு ரயில்வேயின் பல்வேறு நிலைகளில் பணியாற்றியுள்ளார். முன்னதாக, டெல்லியில் மத்திய பெட்ரோலியம், இயற்கை எரிவாயு மற்றும் சுற்றுலாத் துறை இணை அமைச்சரின் தனிச்செயலாளராகவும், அறிவியல் மற்றும் தொழில்நுட்ப அமைச்சகத்தில் துணைச் செயலாளராகவும் பணியாற்றிப் பெரும் அனுபவம் பெற்றவர்.

கோயம்புத்தூரில் உள்ள புகழ்பெற்ற பி.எஸ்.ஜி (PSG) தொழில்நுட்பக் கல்லூரியில் இயந்திரப் பொறியியல் (Mechanical Engineering) பட்டம் பெற்றவர் என்பது குறிப்பிடத்தக்கது. இதுவரை தெற்கு ரயில்வேயின் தலைமை மக்கள் தொடர்பு அதிகாரியாகப் பணியாற்றி வந்த எம். செந்தமிழ் செல்வன், தற்போது ராயபுரம் லோகோ ஷெட்டின் முதுநிலை கோட்ட மின் பொறியாளராகப் பணியிட மாற்றம் செய்யப்பட்டுள்ளார். அவருக்குப் பதிலாகவே எஸ்.என். நரேன் இந்தப் புதிய பொறுப்பை ஏற்றுள்ளார்..