மகளிர் உரிமைத் தொகை வழங்காமல் இழுத்தடிப்பு : முதல்வர் விஜய்க்கு மு.க.ஸ்டாலின் கண்டனம்!

மகளிர் உரிமைத் தொகை  ரூ.2,500 தருவதாகச் சொல்லிவிட்டு, ரூ. 1,000 கூட வழங்கால் தமிழக அரசு இழுத்தடிப்பதாக திமுக தலைவர் மு.க. ஸ்டாலின் கண்டனம் தெரிவித்துள்ளார்.

திமுக ஆட்சியில் கொண்டு வரப்பட்ட 'கலைஞர் மகளிர் உரிமைத் தொகை' திட்டத்தின் கீழ், தகுதியுள்ள பெண்களுக்கு மாதம் ரூ. 1,000 வழங்கப்பட்டு வந்தது. தற்போதைய தவெக அரசு பொறுப்பேற்ற நிலையில், தேர்தல் வாக்குறுதிப்படி இந்தத் தொகையை ரூ. 2,500-ஆக உயர்த்தி வழங்க வேண்டும் என எதிர்க்கட்சிகள் கோரி வருகின்றன. இதற்கிடையில், மே மாதத்திற்கான உரிமைத் தொகையை வழங்குவதில் கால அவகாசம் தேவை என அரசுத் தரப்பில் தெரிவிக்கப்பட்டுள்ளது.

இது குறித்து மு.க. ஸ்டாலின் தனது சமூக வலைதளப் பக்கத்தில் முதலமைச்சரை நோக்கிக் காரசாரமான கேள்விகளை முன்வைத்துள்ளார்:

"ஏற்கனவே நடைமுறையில் உள்ள திட்டத்தைத் தொடர எதற்கு அவகாசம்? என்ன மறுசீரமைப்பு செய்யப் போகிறீர்கள்?"

"திராவிட மாடல் அரசின் மக்கள் நலத் திட்டங்கள் தொடரும் என்று நேற்றுதானே சட்டப்பேரவையில் சொன்னீர்கள்?"

"மாதம் ரூ. 2,500 வழங்குவோம் என்று சொல்லிவிட்டு, தற்போது வழங்கப்பட்டு வந்த ரூ. 1,000-ஐக்கூட தராமல் இழுத்தடிப்பதுதான் நீங்கள் சொன்ன மாற்றமா?" என அவர் கேள்வி எழுப்பியுள்ளார்.

அரசுத் தரப்பு விளக்கம்: முன்னதாக, சட்டப்பேரவையில் எதிர்க்கட்சித் தலைவர் உதயநிதி ஸ்டாலினின் கோரிக்கையை ஏற்று, புதுமைப்பெண் மற்றும் தமிழ்ப்புதல்வன் திட்டங்களுக்கான ரூ. 1,000 இன்று (மே 14) மாணவர்களின் வங்கிக் கணக்கில் வரவு வைக்கப்பட்டது. ஆனால், மகளிர் உரிமைத் தொகை திட்டத்தைச் சீரமைக்கக் கால அவகாசம் தேவைப்படுவதால், மே மாதத்திற்கான தொகை விரைவில் வரவு வைக்கப்படும் என முதலமைச்சர் விஜய் தெரிவித்திருந்தார்.

தேர்தல் வாக்குறுதிப்படி ரூ. 2,500 வழங்கப்படுமா அல்லது தற்போதைய ரூ. 1,000 நடைமுறை தொடருமா என்ற எதிர்பார்ப்பு நிலவும் சூழலில், மு.க. ஸ்டாலினின் இந்த விமர்சனம் தமிழக அரசியலில் பெரும் விவாதத்தை ஏற்படுத்தியுள்ளது.