ஈரான் கப்பல் மூழ்கடிப்பு: மனிதாபிமான அடிப்படையில் உதவினோம் - அமைச்சர் ஜெய்சங்கர் விளக்கம்

இலங்கை அருகே ஈரானின் ஐஆர்ஐஎஸ் தேனா கப்பல் மூழ்கடிக்கப்பட்டது துரதிர்ஷ்டவசமானது என்று தெரிவித்துள்ள இந்திய வெளியுறவுத் துறை அமைச்சர் எஸ். ஜெய்சங்கர், மற்றொரு ஈரான் கப்பலான ஐஆர்ஐஎஸ் லாவன் (IRIS Lavan) விவகாரத்தில் இந்தியா மனிதாபிமானத்துடன் செயல்பட்டதாகக் குறிப்பிட்டுள்ளார்.

மனிதாபிமான அனுமதி: பிப்ரவரி 15 முதல் 25 வரை இந்தியாவில் நடைபெற்ற சர்வதேச கடற்படை மதிப்பாய்வு (IFR 2026) மற்றும் மிலன் 2026 பயிற்சியில் பங்கேற்ற ஈரான் கப்பல்கள், தாயகம் திரும்பும் வழியில் எதிர்பாராத சிக்கல்களைச் சந்தித்தன. இதில் 'ஐஆர்ஐஎஸ் லாவன்' கப்பலில் தொழில்நுட்பக் கோளாறு ஏற்பட்டதால், பிப்ரவரி 28 அன்று ஈரான் இந்தியாவின் உதவியை நாடியது. மார்ச் 1-ம் தேதி இந்தியா அதற்கு அனுமதி வழங்கியதையடுத்து, அந்தக் கப்பல் கொச்சி துறைமுகத்தில் பாதுகாப்பாக நிறுத்தப்பட்டது.

மூழ்கடிக்கப்பட்ட தேனா கப்பல்: இந்தியாவில் பயிற்சியை முடித்துத் திரும்பிக் கொண்டிருந்த 'ஐஆர்ஐஎஸ் தேனா' கப்பல், மார்ச் 4 அன்று இலங்கையின் காலி (Galle) கடற்கரை அருகே அமெரிக்க நீர்மூழ்கிக் கப்பலால் ஏவப்பட்ட டார்பிடோ தாக்குதலில் மூழ்கியது. இதில் 87 பேர் உயிரிழந்ததாகத் தகவல்கள் தெரிவிக்கின்றன.

இந்தியாவின் நிலைப்பாடு:    "லாவன் கப்பலில் இருந்த 183 ஊழியர்களில் பெரும்பாலானோர் இளம் பயிற்சி மாணவர்கள் (Cadets). அவர்கள் ஒரு சுமுகமான சூழலில் பயிற்சிக்கு வந்தனர், ஆனால் எதிர்பாராத அரசியல் சூழலில் சிக்கிக்கொண்டனர். சட்டச் சிக்கல்கள் ஒருபுறம் இருந்தாலும், இக்கட்டான நிலையில் இருந்த அவர்களுக்குப் புகலிடம் அளித்தது மனிதாபிமானச் செயலாகும். இந்தியா சரியானதையே செய்தது," என்று அமைச்சர் ஜெய்சங்கர் உறுதியாகத் தெரிவித்தார்.

தற்போது கொச்சி கடற்படைத் தளத்தில் தங்கியுள்ள 183 ஈரானிய வீரர்களுக்கும் தேவையான வசதிகள் செய்து தரப்பட்டுள்ளன. அதே நேரத்தில், இந்தியப் பெருங்கடல் பகுதியில் வளர்ந்து வரும் பதற்றங்களுக்கு இடையே இந்திய மாலுமிகளின் பாதுகாப்பிற்கே இந்தியா முன்னுரிமை அளிக்கும் என்றும் அமைச்சர் சுட்டிக்காட்டினார்.