நெல்லை அருகே பைக் விபத்தில் கல்லூரி மாணவி பலி - உறவினர் படுகாயம்!

தென்காசி மாவட்டம் ஆலங்குளம் பிள்ளையார் கோவில் தெருவைச் சேர்ந்தவர் விஜயகுமார். இவருடைய மகள் விஜி முத்துக்கனி (18). இவர் ஆலங்குளத்தில் உள்ள அரசு கலைக்கல்லூரியில் இரண்டாம் ஆண்டு படித்து வந்தார். இவர் நேற்று காலையில் நெல்லை மனோன்மணியம் சுந்தரனார் பல்கலைக்கழகத்தில் சான்றிதழ் வாங்குவதற்காக, தனது உறவினரான ஆலங்குளத்தைச் சேர்ந்த ஆறுமுகம் மகன் சொக்கலிங்கம் (26) என்பவருடன் மோட்டார் சைக்கிளில் சென்றார்.

பின்னர் அவர்கள் மதியம் பல்கலைக்கழகத்தில் இருந்து ஆலங்குளத்துக்கு புறப்பட்டு சென்றனர். நெல்ைல அருகே சீதபற்பநல்லூரை கடந்து சென்றபோது, முன்னால் சென்ற லாரியை சொக்கலிங்கம் முந்தி செல்ல முயன்றதாக கூறப்படுகிறது. அப்போது சாலையின் குறுக்காக திடீரென்று மாடு சென்றது. எனவே. அதன் மீது மோதாமல் இருப்பதற்காக சொக்கலிங்கம் மோட்டார் சைக்கிளை நிறுத்த முயன்றார்.

அப்போது மோட்டார் சைக்கிள் நிலைதடுமாறி லாரியின் பக்கவாட்டில் கவிழ்ந்தது. இதில் சாலையில் தூக்கி வீசப்பட்ட விஜி முத்துக்கனியின் தலையில் லாரியின் சக்கரம் ஏறி இறங்கியது. இதில் அவர் தலை நசுங்கி சம்பவ இடத்திலேயே பரிதாபமாக உயிரிழந்தார். சொக்கலிங்கம் படுகாயங்களுடன் உயிருக்கு போராடியவாறு கிடந்தார்.

அந்த வழியாக சென்றவர்கள் இதனைப் பார்த்து அதிர்ச்சி அடைந்து சீதபற்பநல்லூர் போலீசாருக்கு தகவல் தெரிவித்தனர். உடனே போலீஸ் இன்ஸ்பெக்டர் முத்துலட்சுமி மற்றும் போலீசார் விரைந்து சென்று, படுகாயமடைந்த சொக்கலிங்கத்தை மீட்டு சிகிச்சைக்காக நெல்லை அரசு மருத்துவமனைக்கு அனுப்பி வைத்தனர்.

இறந்த விஜி முத்துக்கனியின் உடலைக் கைப்பற்றி பிரேத பரிசோதனைக்காக அதே மருத்துவமனைக்கு அனுப்பி வைத்தனர். மேலும் இதுகுறித்து வழக்குப்பதிவு செய்து விசாரணை நடத்தி வருகின்றனர். நெல்லை அருகே லாரி சக்கரத்தில் சிக்கி கல்லூரி மாணவி பலியான சம்பவம் பெரும் சோகத்தை ஏற்படுத்தியது.