இஷான் கிஷன், ஹர்திக் பாண்டியா அதிரடி: நமீபியாவை வீழ்த்தியது இந்திய அணி!

ஐசிசி டி20 உலகக் கோப்பை கிரிக்கெட் தொடரில், நமீபியாவுக்கு எதிரான லீக் ஆட்டத்தில் இந்திய அணி 93 ரன்கள் வித்தியாசத்தில் அபார வெற்றி பெற்றது. டெல்லி அருண் ஜேட்லி மைதானத்தில் நடைபெற்ற ‘ஏ’ பிரிவு ஆட்டத்தில், நடப்பு சாம்பியனான இந்தியா தனது இரண்டாவது வெற்றியைப் பதிவு செய்துள்ளது.

இந்திய அணியில் உடல்நலக் குறைவு காரணமாக அபிஷேக் சர்மா விளையாடாத நிலையில், அவருக்குப் பதிலாக சஞ்சு சாம்சன் தொடக்க வீரராகக் களமிறங்கினார். பந்துவீச்சில் முகமது சிராஜிற்குப் பதில் ஜஸ்பிரித் பும்ரா சேர்க்கப்பட்டார். ஆட்டத்தின் தொடக்கத்திலேயே சஞ்சு சாம்சன் மற்றும் இஷான் கிஷன் ஜோடி அதிரடியில் இறங்கியது. சாம்சன் 8 பந்துகளில் 3 சிக்ஸர்கள், ஒரு பவுண்டரியுடன் 22 ரன்கள் எடுத்து ஆட்டமிழந்தார்.

அடுத்து வந்த திலக் வர்மாவுடன் இணைந்து இஷான் கிஷன் நமீபியா பந்துவீச்சை சிதறடித்தார். குறிப்பாக, ஜே.ஜே. ஸ்மித் வீசிய 6-வது ஓவரில் 4 சிக்ஸர்கள், ஒரு பவுண்டரி என மொத்தம் 28 ரன்களை விளாசினார். இதன் மூலம் ஒரு ஓவரில் அதிக ரன்கள் எடுத்த இந்திய வீரர்கள் பட்டியலில் ரோஹித் சர்மாவுடன் (28 ரன்கள்) இஷான் கிஷன் 2-வது இடத்தைப் பகிர்ந்து கொண்டார். 20 பந்துகளில் அரைசதம் கடந்த அவர், மொத்தம் 24 பந்துகளில் 61 ரன்கள் (5 சிக்ஸர், 6 பவுண்டரி) குவித்து ஆட்டமிழந்தார்.

சூர்யகுமார் யாதவ் 12 ரன்களிலும், திலக் வர்மா 25 ரன்களிலும் ஆட்டமிழந்தனர். பின்னர் வந்த ஹர்திக் பாண்டியா அதிரடியாக விளையாடி 27 பந்துகளில் தனது 8-வது அரைசதத்தைப் பூர்த்தி செய்தார். அவர் 28 பந்துகளில் 52 ரன்கள் எடுத்து வெளியேறினார். இறுதியில் ஷிவம் துபே 23 ரன்கள் எடுக்க, இந்திய அணி 20 ஓவர் முடிவில் 9 விக்கெட் இழப்பிற்கு 209 ரன்கள் குவித்தது.

நமீபியா தரப்பில் கேப்டன் ஜெரார்டு எராஸ்மஸ் 4 விக்கெட்டுகளைக் கைப்பற்றி அசத்தினார். 210 ரன்கள் என்ற இலக்குடன் களமிறங்கிய நமீபியா அணி, இந்திய பந்துவீச்சை எதிர்கொள்ள முடியாமல் திணறியது. 18.2 ஓவர்களில் அந்த அணி 116 ரன்களுக்கு ஆல்-அவுட் ஆனது.

வருண் சக்ரவர்த்தி: 3 விக்கெட்டுகள்

அக்சர் படேல்: 2 விக்கெட்டுகள்

ஹர்திக் பாண்டியா: 2 விக்கெட்டுகள்

93 ரன்கள் வித்தியாசத்தில் வெற்றி பெற்ற இந்தியா, 4 புள்ளிகளுடன் தனது பிரிவில் முதலிடத்தைப் பிடித்தது. டி20 உலகக் கோப்பை வரலாற்றில் இது இந்தியாவின் தொடர்ச்சியான 10-வது வெற்றி என்பது குறிப்பிடத்தக்கது. ஆட்ட நாயகனாக ஹர்திக் பாண்டியா தேர்வு செய்யப்பட்டார்.